जाजरकोट । भूमि समस्या समाधान आयोगले स्थानीय तहमा जग्गा नापजाँचको कामलाई तीव्रता दिन प्राविधिक कर्मचारी खटाएको छ ।
आयोगले संघबाट १६ जना कर्मचारी पठाएको छ, जसमा १० जना अमिन र ६ जना सर्वेक्षक रहेका छन् । यी कर्मचारीहरूलाई करार सेवामा नियुक्त गरिएको हो ।
जाजरकोटका सात स्थानीय तहमा आवश्यकताको आधारमा कर्मचारी खटाइएको छ। आयोगका विज्ञ सदस्य नवराज शाहीका अनुसार छेडागाड नगरपालिकामा १ जना सर्वेक्षक र ४ जना अमिन, शिवालय गाउँपालिकामा १ जना सर्वेक्षक र २ जना अमिन तथा नलगाड नगरपालिकामा १ जना सर्वेक्षक र १ जना अमिन खटाइएको छ। अन्य पालिकामा आवश्यकतानुसार कर्मचारी परिचालन गरिने उनले जानकारी दिए ।
भूमि समस्या समाधान आयोगका अनुसार जाजरकोटमा हालसम्म लगत संकलन र प्रविष्टिकरणको ७५ प्रतिशत काम पूरा भएको छ। जिल्लामा केही सङ्ख्यामा भूमिहीन दलित, सुकुम्बासी तथा अव्यवस्थित बसोवासी रहेका छन् । आयोगको तथ्याङ्कअनुसार हालसम्म ११ हजार २ सय ४६ जनाले जग्गाधनी प्रमाणपत्रका लागि निवेदन दर्ता गराएका छन् ।
जिल्लाका सातै पालिकामा अव्यवस्थित बसोवासी, भूमिहीन दलित र भूमिहीन सुकुम्बासीलाई जग्गाको स्वामित्व हस्तान्तरण गर्ने तयारीस्वरूप जग्गा नापजाँचका प्रारम्भिक कार्यहरू जारी रहेका छन् ।
