जाजरकोट । नेपाल विद्यार्थी संघ, जिल्ला कार्यसमिति जाजरकोटले आगामी एसईई परीक्षा २०८१ मा उत्कृष्ट अङ्क ल्याउने विद्यार्थीहरूलाई सम्मान गर्ने घोषणा गरेको छ। संघले जिल्लाभरबाट उच्चतम अंक प्राप्त गर्ने शीर्ष तीन विद्यार्थीहरूलाई सम्मान गरिने जनाएको छ।
संघका अध्यक्ष अनिस कार्कीले एसईई परीक्षार्थीहरूलाई शुभकामना दिँदै भने, “विद्यार्थीहरूको मेहनत र लगनशीलतालाई प्रोत्साहन गर्न हामीले सम्मान कार्यक्रमको घोषणा गरेका हौं। शिक्षा नै समृद्धि र उज्ज्वल भविष्यको आधार भएकाले मेहनती विद्यार्थीहरूलाई हौसला दिनु आवश्यक छ।”
संघले सम्मानका लागि विशेष कार्यक्रम आयोजना गर्ने र शीर्ष विद्यार्थीहरूलाई प्रशंसा पत्रसहित नगद पुरस्कार प्रदान गरिने जनाएको छ।
जिल्लाका विद्यार्थीहरूलाई अझ प्रेरित गर्न यस्तो सम्मान कार्यक्रम प्रभावकारी हुने विश्वास गरिएको छ। संघले परीक्षार्थीहरूलाई धैर्य, अनुशासन र आत्मविश्वासका साथ परीक्षा दिन आग्रह गर्दै उज्ज्वल भविष्यको कामना गरेको छ।
