भदौं जाजरकोट । जाजरकोटको भेरी नगरपालिका वडा कार्यालय भवन निर्माणको ठेक्कामा अनियमितता गरेको आरोपमा ८ जनाविरुद्ध भ्रष्टाचार मुद्दा दायर भएको छ ।बिहीबार अख्तियार दुरूपयोग अनुसन्धान आयोगले वडा कार्यालय भवन निर्माणको ठेक्कामा अनियमितता गरेको आरोपमा नगरपालिकाका ६ जना कर्मचारी र ठेकेदार कम्पनीका दुईजना गरी आठजनाविरुद्ध विशेष अदालत, काठमाडौंमा भ्रष्टाचार मुद्दा दायर गरेको विज्ञप्तिमा उल्लेख छ ।
भेरी नगरपालिकाका निमित्त प्रमुख प्रशासकीय अधिकृत दलबहादुर घर्ती, ईञ्जिनियर मोहन मल्ल, कानून अधिकृत प्रकाशकुमार शाही, सामाजिक विकास अधिकृत अनिस साह, लेखापाल राजेन्द्रबहादुर कठायत र जिन्सी शाखा प्रमुख तथा नायव सुब्बा कृतिबहादुर थापाविरुद्ध मुद्दा दायर भएको छ ।मुद्दामा ठेकेदार गंगाकुमारी खड्का र चित्रबहादुर बोहरालाई प्रतिवादी बनाइएको छ । आयोगले उनीहरूविरुद्ध ३६ लाख २० हजार ५७८ रुपियाँ विगो माग गर्दै मुद्दा दायर गरेको छ ।उनीहरूले आर्थिक वर्ष २०८०/ ०८१ मा भेरी नगरपालिकाको वडा नम्बर ६,९ र १० को वडा कार्यालय भवन निर्माणको ठेक्का प्रक्रियामा सार्वजनिक खरिद कानून विपरीतको कार्य गरी अनियमितता गरेको अनुसन्धानबाट खुल्न आएको अख्तियारको ठहर छ ।
