सुर्खेत । कर्णाली प्रदेश सरकारले गठन भएको तीनमहिनापछि पूर्णता पाएको छ । जीवनबहादुर शाहीले मुख्यमन्त्रीका रुपमा कात्तिक १६ गते सपथग्रहण गरेपछि तीन महिनापछि पूर्णता दिएका हुन् । नवनियुक्त मन्त्रीहरुले आइतबार नै पद तथा गोपनियताको सपथ लिएका छन् । कांग्रेसबाट दुई, माओवादी केन्द्रबाट दुई र समाजवादीबाट एकजना मन्त्री नियुक्त भएका छन् ।
कर्णाली प्रदेशका नवनियुक्त पाँच मन्त्रीले पद तथा गोपनीयताको शपथ लिएका छन् । प्रदेश प्रमुखको कार्यालयमा आयोजित एक कार्यक्रमका बीच नवनियुक्त मन्त्रीहरूले आइतबार साँझ प्रदेश प्रमुख तिलक परियारबाट पद तथा गोपनीयताको शपथ लिएका हुन् । गत १६ कातिकमा मुख्यमन्त्री बनेका जीवनबहादुर शाहीले आफ्नै दल नेपाली कांग्रेस, माओवादी केन्द्र र एकीकृत समाजवादीबाट पाँच जना मन्त्री नियुक्त गरेका छन् । मुख्यमन्त्री शाहीले पद तथा गोपनियताको सपथ लिएको तीन महिनापछि मन्त्री परिषद्लाई पूर्णता दिएका हुन ।
तीन दलीय गठबन्धन रहेको कर्णालीमा काँग्रेसबाट सुर्खेतका सांसद मन्त्रीमा यज्ञबहादुर बिसी सामाजिक विकास र दैलेखका सांसद हिम बहादुर शाहीलाई आन्तरिक मामिला तथा कानुनमन्त्री नियुक्त भएका छन् । त्यस्तै, गठबन्धनभित्रको सबैभन्दा ठूलो दल नेकपा माओवादी केन्द्रबाट जाजरकोटका सांसद गणेशप्रसाद सिंह जलस्रोत तथा ऊर्जामन्त्री र हुम्लाका गैरसांसद छिरिङ दमदोल लामा ९कार्चेन० उद्योग, पर्यटन, वन तथा वातावरण मन्त्रीमा नियूक्त भएका छन् ।
त्यस्तै, एकीकृत समाजवादीबाट जुम्लाका सांसद पदमबहादुर रोकाया भौतिक, पूर्वाधार तथा सहरी विकासमन्त्रीमा नियुक्त भएका छन् । माओवादीबाट यसअघि विन्दमान विष्ट आर्थिक मामिला तथा योजनामन्त्री बनिसकेका छन् भने एकीकृत समाजवादीबाट दलका नेता चन्द्रबहादुर शाही भूमि व्यवस्था, कृषि तथा सहकारी मन्त्री बनिसकेका छन् । यो सँगै आठ सदस्यीय प्रदेश मन्त्रीमण्डलले पूर्णता पाएको छ ।
यसअघि चारवटा मन्त्रालयको दाबी गर्दै आएको माओवादीले तीन र तीनवटा मन्त्रालयको दाबी गर्दे आएको एकीकृत समाजवादीले दुईवटा मन्त्रालयमा चित्त बुझाएका छन् । गैरसांसद कार्चेन लामालाई माओवादीले मन्त्री बनाएको भन्दै दलभित्रकै नेताहरूले असन्तुष्टि व्यक्त गरिरहेका छन् ।
